Innskrifta er i form og utføring av høg kvalitet. Mannen bak er steinhoggaren Kolstad som i mai-juni 1911 kom frå Bergen og arbeidde i fleire dagar med innskrifta. I fylgje Sogns Tidend var Kolstad ein kjend steinhoggar som hadde røynsle frå domkyrkjene i Trondheim og Bergen.Datering: 2001. Eigar: Fylkesarkivet i Sogn og Fjordane. Fotograf: Hermund Kleppa.

Den 8. og 9. april står Vestlands-konferansen VEGEN VIDARE på programmet (Dag og Tid 19.04). Samferdsleministeren og mange andre skal setja søkelys på ”kommunikasjonar, kultur, nærings- og reiseliv”. Valet av Kvikne`s Hotel som konferansestad passar bra. Det står ein minnestein knytta til samferdsle tett attmed hotellet.

Fleire samferdsle-minnesteinar
Sogn og Fjordane har fleire minnesteinar knytta til samferdsle. I Lærdal har dei ein stein til minne om første bilturisten over Filefjell (1901, reist 1976). Stryn har ein minnestein om opninga av vegen Olden-Innvik (1936, reist same året). I Aurland, Flåm, står ein minnestein over fylkesmann Christensen, som takk og heider for arbeidet hans med å få bygt Flåmsbana (1940, reist 1956). Minnesteinen i Balestrand er knytta til sjøverts kommunikasjon. Bautaen vart reist i 1911 til minne om dei to av skiparane, fylkesmann Aubert og sokneprest Sverdrup.

Balestrendingane vonbrotne i 1958
Merkeleg nok har Fylkesbaatane-minnesteinen i Balestrand vore lite ”høgtida på”. Endå til då steinen vart avduka i 1911, var stemninga laber. Det kom av at to bokstavar i innskrfita vekte harme hjå framståande riksmålsfolk. Nokon hadde fått ordna med at det i innskrifta stod amtmann med n i staden for amtmand med d, og sokneprest i staden for sogneprest med g. Målsaka vart viktigare enn innhaldet i det steinen var reist for.

Då Fylkesbaatane feira 100 årsjubileum i 1958, var kongen på gjesting i fylket. Olav V kom med tog til Flåm om morgonen, måndag 2. desember, og gjekk om bord i MS ”Sunnfjord”. Båten var oppom Hermansverk og gjekk vidare ut fjorden til Høyanger. I Balestrand hadde dei laga til ei markering ved Fylkesbaatane-minnesteinen med både tale og musikk. Før på dagen hadde prost Reed lagt ned krans frå Balestrand kommune på grava til sokneprest Sverdrup. Dei håpa at kongeskipet skulle koma framom, og vonbrotet var stort då dei berre så vidt skimta ”Sunnfjord” langt ute på fjorden.

Stoppestad i kulturvandring
Heller ikkje ved 150 årsjubileet i 2008 vart Fylkesbaatane sin minnestein i Balestrand brukt som innslag i jubileet, korkje av eigaren, Sogn og Fjordane fylkeskommune, eller av transportselskapet, Fjord1 Fylkesbaatane. På konferansar har dei gjerne kulturinnslag på kveldstid med å spasertur og guide. Fylkesbaatane-steinen er ein bra stoppestad i ei eventuell kulturvandring på Vestlands-konferansen Vegen Vidare .

Les artikkelen Minnestein i Balestrand over skiparane av Fylkesbaatane her.

Konferanseprogram og påmelding finn du her.